Տեր-Պետրոսյանն Ավելի Ապահովված Է

ՀՀ նախագահ Սերժ Սարգսյանին հունիսի 20-ին առաջարկել եմ 1-1,5 տարվա ընթացքում արտահերթ նախագահի ընտրություններ անցկացնել եւ ժամկետն այսօր հայտնելՙ,- ասում է Քաղաքական վերլուծությունների ՚Ակունքՙ կենտրոնի տնօրեն, Սանկտ Պետերբուրգում Հայաստանի նախկին հյուպատոս, նախկին ՀՅԴ-ական Ռուբեն Հակոբյանը:

Վերջինիս առաջարկին Սերժ Սարգսյանի գրասենյակից պատասխանել են. ՚Ընդունում ենք ի գիտությունՙ, ինչը միանշանակ մերժում է նշանակում:

Հակոբյանը արտահերթ ընտրությունները ՀՀ-ում համարում է անխուսափելի. ՚Իշխանությունները չեն ցանկանում արտահերթ ընտրություններ անցկացնել, որովհետեւ ռեսուրս չունեն: Ես Սերժ Սարգսյանի շուրջ չեմ տեսնում հավատարիմ մարդկանց, ովքեր պատրաստ են պայքարել մինչեւ վերջ: Ի տարբերություն Սերժ Սարգսյանի` Տեր-Պետրոսյանը ավելի ապահոված է իր կողմնակիցների հավատարմությամբ: Եթե իշխանությունները չկազմակերպեն արտահերթ ընտրություններ, ապա ընտրությունները պարտադրված կլինեն, եւ կպարտադրի ժողովուրդըՙ:

Նա գտնում է, որ իշխանության ամենամեծ սխալը հետեւյալն է.՚Փոխարենը մտածեն, թե ինչն է պատճառը, որ 10 տարի առաջ իշխանությունից հեռացած Տեր-Պետրոսյանի կողքին 400 հազար մարդ է հավաքվում, ասում են, որ դրսից են ֆինանսավորում շարժումը, որպեսզի վարկաբեկեն ընդդիմությանըՙ:

Ռուբեն Հակոբյանի կարծիքով` Տեր-Պետրոսյանը լինելով փորձառու քաղաքական գործիչ կարողանում է խաղալ իշխանության թույլ տված սխալների վրա: Օրինակ`ավելի մեծ պարգեւ Տեր-Պետրոսյանին ոչ ոք չէր արել. ՚Իշխանությունն իր թեթեւ ձեռքով ամբողջ ընդդիմադիր դաշտը նվիրեց Տեր-Պետրոսյանին` դաշտից հանելով ՕԵԿ-ին եւ ՀՅԴ-ինՙ:

Խոսելով Քոչարյանի վերջին հարցազրույցի մասին, որտեղ վերջինս բացահայտ ասում է, որ առաջիկա զարգացումներով Տեր-Պետրոսյանի մրցակից լինելու է ոչ թե Սերժ Սարգսյանը, այլ ինքը, Ռուբեն Հակոբյանն ասաց. ՚Ասուլիսներում, հանրահավաքներում ինչ մեղադրանքներ ասես չհնչեցին Ռոբերտ Քոչարյանի հասցեին, սակայն չգտնվեց մի ուժ, անհատ, որ նրան պաշտպանի, ի վերջո այսօրվա կոալիցիան, խորհրդարանը նախ եւ առաջ Քոչարյանի ծնունդն է: Արմատական ընդդիմությունը եւ իշխանությունը` գոնե ներքին օղակների մակարդակով կողմ են ստեղծել բանակցությունների այն հարթությունը, որտեղ իրենց շահերը կարծես թե պետք է համընկնեն: Եւ Տեր-Պետրոսյանը առաջին կոնգրեսի ժամանակ հայտարարեց, որ այս ամենի պատասխանատուն, այդ թվում` մարտի 1-ի Քոչարյանն է, եւ եթե իշխանությունները կարողանան տարանջատվել Քոչարյանից, կարող են երկխոսել: Իշխանության ներքին մակարդակի արձագանքները կարծես, թե դրական են Տեր-Պետրոսյանի ակնարկին: Իհարկե, վերջնական որոշումը Սերժ Սարգսյանինն է, սակայն Լեւոն Տեր-Պետրոսյանի գլխավորությամբ արմատական ընդդիմության եւ իշխանության ներքին օղակների միջեւ այդ իմպուլսները կան, շահերի համընկնում կաՙ:

Այն ինչ կատարում է այսօր իշխանությունը, Հակոբյանի կարծիքով, բացարձակապես կապ չունի իրականության հետ: ՚Վերջին զարգացումները ցույց են տալիս, որ իշխանությունն ամեն ինչ անում է, որ պահի իր իշխանությունը: Դեկլարատիվ հայտարարություններից դուրս իշխանությունն ռեալ քայլեր չի ձեռնարկում հանրապետությունում իրավիճակը լիցքաթափելու համար: Դժբախտաբար, իշխանությունը երկրում ստեղծված լարվածությունը լուծեց ոչ թե ի օգուտ պետության, այլ իր իշխանությունը պահելունՙ,-ասաց նա:

Ռուբեն Հակոբյանը վստահ է, որ եթե ՕԵԿ-ը եւ ՀՅԴ-ն չընդգրկվեին կոալիցիայի կազմում, ապա իրավիճակը շատ ավելի լավ կլիներ, իսկ ՕԵԿ-ի եւ ՀՅԴ-ի քայլը այսպես մեկնաբանեց. ՚Այդ կուսակցությունները ընդգրկվեցին կոալիցիայի մեջ, որպեսզի ընդամենը չքննադատեն նախագահի գործունեությունը եւ ուրիշ ոչինչՙ:

՚ԱՎԵԼԻ ԼԱՎ Է ՍԱՌԵՑՆԻ ՑԵՂԱՍՊԱՆՈՒԹՅԱՆ ՀԱՐՑԸՙ

Ռուբեն Հակոբյանը դեկլարատիվ բնույթի է համարում նաեւ իշխանությունների այն հայտարարությունները, թե ՀՀ-ում քաղբանտարկյալներ չկան. ՚Ալիկ Արզումանյանի կամ Արարատ Զուրաբյանի ներկայության դեպքում չի կարելի ասել, որ Հայաստանը չունի քաղբանտարկյալներՙ:

Ինչ վերաբերում է մարտի 1-ի գործով ԱԺ ժամանակավոր հանձնաժողովի նախագահի Արարատ Զուրաբյանին այցելելու փաստին ապա Հակոբյանն ասաց. ՚Այսօր լսեցի, որ հանձնաժողովի նախագահը այցելել է Արարատ Զուրաբյանին եւ քննարկել են շատ լուրջ հարցեր` տարածաշրջանային, ԼՂ հիմնախնդիրը եւ այլն: Իսկապես զավեշտ է. բաց թողեք եւ նոր քննարկեք այդ հարցերըՙ:

Ի դեպ, Հակոբյանը դեմ է Ռոբերտ Քոչարյանի գործը Հաագայի դատարան հանձնելու գործընթացին` նշելով, որ վաղ, թե ուշ Ադրբեջանի եւ Թուրքիայի քարոզչությունը այս հարցը օգտագործելու է Հայաստանի դեմ: Ընդհանրապես նա գտնում է, որ մեր արտաքին քաղաքականությունն ու դիվանագիտությունն այսօր ահազանգող է. ՚Երկար տարիներ է դիվանագիտության մեջ եմ, սակայն երբեւէ մեր դիվանագիտությունը այսքան խղճուկ վիճակում չի եղելՙ:

Նա հիշեցրեց, որ ժամանակին, երբ Տեր-Պետրոսյանը նախաձեռնեց Հայ-թուրքական հաշտեցման հանձնաժողովի ստեղծումը, ինչպիսի դիամադրություն եղավ այն ժամանակվա ընդդիմության կողմից, մինչդեռ Տեր-Պետրոսյանը հանձնաժողով ստեղծելով` ամենեւին կասկածի տակ չէր դնում 1915թ. Հայոց ցեղասպանության փաստը, իսկ Սերժ Սարգսյանի հայ-թուրքական պատմաբանների հանձնաժողով ստեղծելու հայտարարության կապակցությամբ ասաց. ՚Իմ կարծիքով ավելի լավ է` ասենք` սառեցնում ենք ցեղասպանության հարցը, քան ասենք` եկեք հանձնաժողով ստեղծենք, որը կպարզի` ցեղասպանություն եղել է, թե ոչ, այն դեպքում երբ մեր գաղթօջախները ցեղասպանության արդյունքում են ստեղծելՙ: Անդրադառնալով Ռոբերտ Քոչարյանի այն հայտարարությանը, թե եթե ինքը լիներ Սերժ Սարգսյանի փոխարեն, ապա Թուրքիայի նախագահ Աբդուլա Գյուլին Հայաստան չէր հրավիրի ֆուտբոլ դիտելու, Ռուբեն Հակոբյանը համարեց մարտից հետո բռունցքներով թափահարում:

Այսօր նախկին դիվանագետը դատապարտեց նաեւ ընտրություններից հետո` փետրվարի 25-ին միանգամից 10 դիվանագետի աշխատանքից ազատելուն`միայն նրա համար, որ քաղաքական կողմերին կոչ էին արել զերծ մնալ ուժի կիրառումից: Նշելով, որ մեր նման երկրի համար 1 դիվանագետ պատրաստելը շատ թանկ է, միանգամից 10-ին հեռացնելը Հակոբյանը համարեց մեծ շռայլություն: Ինչ վերաբերում ՀՅԴ-ին քարոզարշավին իր մասնակցությանը, ապա նա նշեց, որ չի մասնակցել, ելույթ չի ունեցել, ընդամենը կանգնել է հարթակում: